Çeşmäküü teoretik liţeydä «Gagauz dilini genişletmäk hem ilerletmäk» programasına görä geçti «Ekmek günü yortusu». Canavar ayın 16-nda Halklar arası «Ekmek günü» yortusu nışannanêr hem kutlanılêr.
5-inci klastan üürenicilär barabar gagauz dili hem literaturası üüredicisinnän Kivel N.E. hazırladılar «Ekmek gagauzların kulturasında» yortu programasını. Ayırı sayfa — ekmään paası aaçlık vakıdında. Anıldı 1946-1947-nci yıllarda aaçlaa kurban olan cannar. Büük saygıylan hem hatırlan tuz-ekmeklän musaafirlär karşılandı, ekmään yolu kırdan fırına kadar annadıldı, ekmek çeşitleri gagauz sofrasında belli edildi. Aylä yardımınnan 5-inci klastan üürenicilär ikram ettilär musaafirlerä: çörek, korik, turta, gözlemä, pidä, kirdä, gevrek, kolaç, somun ekmek, akıtma. Bu yortu çok vakıda kalacek hepsinin aklısında.
Sofrada başka imeklär da olsa, biz çaarêrız: «Ekmek imää!» Koruyalım ekmää, unutmayalım — o dünnenin temeli!